Fréttir

Hveragerðisskáldin í heimsókn á Klaustri

10 Apr
10. apríl 2013

Listvinafélagi Hveragerðis var boðið að koma með sýninguna „Listamannabæinn Hveragerði – fyrstu árin“ á ráðstefnuna Menningarlandið 2013 – framkvæmd og framtíð menningarsamninga, sem haldin er á Kirkjubæjarklaustri dagana 11. – 12. apríl.

Að ráðstefnunni standa; Mennta- og menningarmálaráðuneyti, atvinnu- og nýsköpunarráðuneyti, Samband íslenskra sveitarfélaga, og Menningarráð Suðurlands í samstarfi við önnur menningarráð landsbyggðarinnar.

Sjá nánar um ráðstefnuna hér

Boð til aðalfundar

01 Mar
1. mars 2013

Listvinafélag Hveragerðis boðar til aðalfundar laugardaginn 16. mars 2013, kl. 11.00 í Listasafni Árnesinga.

Fundarefni:

1. Venjuleg aðalfundarstörf

Á aðalfundi 2013 skal kjósa 2 aðalmenn og 1 varamann til tveggja ára.

Þeir sem eiga að ganga úr stjórn að þessu sinni eru: Svanur Jóhannesson og Inga Jónsdóttir í aðalstjórn og Sölvi Ragnarsson í varastjórn.

Tillögur um lagabreytingar berist til formanns, listvinir@listvinir.is eða skriflega að Breiðahvammi, 816 Ölfusi fyrir kl. 16:00 sunnudaginn 10. mars 2013.

Tillaga frá stjórn: Stjórn Listvinafélags Hveragerðis leggur til að árgjald félagsins verði 2000 kr.

2. Lyst og list: súpuhlé og listræn dagskrá 

Listvinafélagið býður félagsmönnum upp á súpu í hádeginu.

Tvær nýjar sýningar standa nú yfir í Listasafni Árnesinga:

  • Til sjávar og sveita – verk eftir Gunnlaug Scheving og
  • Slangur – verk eftir Söru Riel.

Inga Jónsdóttir safnstjóri segir frá sýningunum og býður gestum upp á leik.

Allir félagsmenn eru hvattir til að mæta.

Stjórnin

Lög Listvinafélags Hveragerðis

Jólin koma – Jólasýning Landsbókasafns

09 Dec
9. desember 2012

Jólasýning Landsbókasafns Íslands – Háskólabókasafns var opnuð nú í byrjun desember en tilefni sýningarinnar er 80 ára útgáfuafmæli kvæðakversins Jólin koma eftir Jóhannes úr Kötlum. Sýningin er haldin í samstarfi við Forlagið sem gefur kverið út í sérstakri hátíðarútgáfu af þessu tilefni. Sýningin stendur fram á þrettándann 2013.

Árið 1932 kom út kvæðakver Jóhannesar úr Kötlum, Jólin koma, með vísum um íslenskar jólavættir. Tryggvi Magnússon myndskreytti bókina, en hann var þá þekktasti teiknari landsins. Bókin er nú sem fyrr ein vinsælasta ljóðabók Íslendinga í desembermánuði og trónir alla jafna í fyrsta sæti sölulista bókabúðanna í sínum flokki.

Bókin kom út á tíma sjálfstæðisbaráttunnar þegar þjóðararfurinn gekk í endurnýjun lífdaga. Þjóðsagnaminni voru færð nær þjóðinni og um leið mörkuð sérstaða íslenskrar menningar.

Á fyrri hluta 20. aldar var litið á íslensku jólasveinana sem tröll en jólasveinar Tryggva minna frekar á bændur. Þeir eru í eðlilegri stærð og klæðaburður þeirra þótti kunnuglegur. Þannig færði Tryggvi íslensku jólasveinana nær börnunum og jafnframt varð smám saman til málamiðlun á milli íslensku tröllanna og ameríska jóla­sveinsins.

Jólasveinarnir fengu að vera þrettán talsins og heita sínum gömlu nöfnum. Aftur á móti fóru þeir smám saman að klæðast sömu fötum og sá ameríski og gefa gjafir jafnframt því að halda sínum séreinkennum og hrekkjum.

Jóhannes úr Kötlum notaði að mestu sömu nöfn á sveinana og séra Páll Jónsson á Myrká (1812-1889) sjötíu árum fyrr í þjóðsagnasafni Jóns Árnasonar.
Með þessu kvæði sínu má segja að Jóhannes hafi sett í fastar skorður nöfn jólasveinanna, fjölda þeirra og í hvaða röð þeir halda til byggða.

Landsbókasafn eignaðist árið 1989 frumeintök teikninganna í Jólin koma og er útgáfa Forlagsins í ár byggð á þeim myndum.

Myndir: Helgi Bragason/Landsbókasafn Íslands

Dagskrá Listvinafélags Hveragerðis laugardaginn 10. nóvember

09 Nov
9. nóvember 2012

Dagskrá á vegum Listvinafélags Hveragerðis sem frestað var vegna veðurs síðasta laugardag verður haldin á laugardaginn kemur, 10. nóvember, í Listasafni Árnesinga.

Dagskráin hefst kl. 13:00 og stendur í um klukkustund.
1. Guðrún A. Tryggvdóttir formaður kynnir félagið og sýninguna Listamannabærinn Hveragerði – fyrstu árin.
2. Svanur Jóhannesson og Heiðdís Gunnarsdóttir opna nýjan vef félagsins.
3. Páll Svansson vefhönnuður kynnir vefinn og tímalínu með upplýsingum um listamenn í Hveragerði fyrr og nú.
4. Anna Margrét Stefánsdóttir les úr bók sinni Engillinn minn.
5. Magnús Þór Sigmundsson flytur nokkur af lögum sínum.

Fundarstjóri er Inga Jónsdóttir safnstjóri Listasafns Árnesinga.
Allir velkomnir.

Munir Kristjáns frá Djúpalæk

08 Nov
8. nóvember 2012

Nýlega barst Listvinafélagi Hveragerðis höfðingleg gjöf frá Kristjáni Kristjánssyni, syni Kristjáns frá Djúpalæk. Þetta eru 13 munir úr eigu föður hans, m.a. skrifborð, málverk af Kristjáni eftir Kristján Friðriksson, teikning eftir Ríkarð Jónsson myndskera, tóbaksdós úr silfri, teikning af Kristjáni eftir Höskuld Björnsson listmálara, óbirt afmælisljóð Kristjáns til Kristmanns Guðmundssonar rithöfundar fimmtugs og óbirt bréf Kristjáns til sonar síns frá 1988 „Austan fjalls í 11 ár“, útskorinn spónn eftir Ríkarð Jónsson og útskorin askja til Unnar konu Kristjáns eftir Guðmund Böðvarsson, skáld á Kirkjubóli.

Munirnir hafa verið afhentir Byggðasafni Árnesinga til varðveislu og verða þeir skráðir í gagnagrunninn Sarp og gefendur þar tilgreindir Listvinafélag Hveragerðis og Kristján Kristjánsson. Von Kristjáns er sú að Listvinafélaginu auðnist að koma á fót Skáldasafni í Hveragerði í framtíðinni, en þangað til verða gripirnir varðveittir í byggðasafninu.